Vínhúsið Marchesi Aninori er einn stærsti og virtasti vínframleiðandi Ítalíu í dag en sögu þess má rekja allt aftur til ársins 1385. Á áttunda áratug síðustu aldar spilaði Marchesi Antinori stóran þátt í „Super-Tuscan“byltingunni og kom fram með vín á borð við Tignanello, Solaia og Guado al Tasso. En þessi bylting hófst þegar vínbændur í Toskana hófu að setja á markað afburðarvín, svokölluð Super Tuscans, sem uppfylltu ekki skilyrðin til að teljast DOC/G-vín en mörg þeirra öðluðust aftur á móti viðurkenningu víða um heim. Flokkurinn IGT ,Indicazione Geografica Tipica, leggur mesta áherslu á uppruna vínanna en síður hvaða þrúgur eru notaðar við víngerðina, framleiðsluaðferðir vínanna eða stíl þeirra.

Villa Antinori IGT fellur í þennan flokk en það er 55% framleitt úr Sangiovese, 25% úr Cabernet Sauvignon, 15% úr Merlot og 5% úr Syrah. Þetta vín kom fyrst á markað árið 1928 og var þá flokkað sem Chianti Classico. Á árinu 2001 breytti Piero Antinori, núverandi stjórnandi vínhússins, þeim þrúgum sem notaðar eru í þetta vín og samsetningu þeirra. Það var til þess að í dag er það flokkað sem IGT en ekki Chianti Classico DOCG. Vínið er fyrst látið þroskast 12 mánuði á frönskum, ungverskum og amerískum eikartunnum og síðan látið þroskast í 8 mánuði á flösku áður en það var sett á markað.

Þetta rúbínrauða vín tekur á móti manni með angan af þroskuðum ávexti, kirsuber, sólber og trönuber, tóbak, kaffi og leður. Flottur karakter í góðu jafnvægi, silkimjúk með góðri fyllingu. Fersk sýra, tiltölulega mjúk tannín.

Hér er um að ræða frábært matarvín sem passar vel með bragðmiklum ítölskum pastaréttum, t.d. Pasta alla Norma eða Spaghetti alla puttanesca, smellpassar líka með rauðu kjöti, bæði lamba- og nautakjöti, og jafnvel léttri villibráð.

Villa Antinori IGT 2014 fær fjórar stjörnur – VIRKILEGA GÓÐ KAUP á þessu verði en flaska af þessu víni kostar einungis kr. 2.899 í vínbúð allra landsmanna.

Þetta stórgóða vín kemur frá vínhúsinu Librandi í héraðinu Calabria sem staðsett er syðst á Ítalíu. Vínhúsið Librandi var stofnað um miðja síðustu öld hefur alla tíð verið er í eigu samnefndrar fjölskyldu sem hefur mikla ástríðu fyrir þeim þrúgum sem eiga uppruna sinn að rekja til héraðsins.

Librandi Ciro Rosso DOC 2014  er framleitt að öllu leyti úr þrúgunni Gaglioppo sem upprunin er frá Calabria og má líkja henni að nokkru leyti við frönsku þrúguna Pinot Noir. Þetta vín er fyrst látið þroskast á stáltönkum til að viðhalda unggæðingslegum karakter þess áður en það er látið þroskast í nokkra mánuði á flösku áður en það er sett á markað.

Ekki láta blekkjast þótt litur þessa víns sé nokkuð ljós, svolítið í anda Pinot Noir, því hér er um að ræða hörkuvín sem svíkur engan. Angan af rauðum ávexti, pínulítið kryddaður, ásamt trönuberjum og plómum. Þroskuð tannín, ágætis fylling, fersk sýra og ljúft eftirbragð. Auðmjúkt og afslappað vín.

Þetta er virkilega gott matarvín sem passar vel með bragðmiklum ítölskum pastaréttum, t.d. Spaghetti alla scarpariello eða Spaghetti alla puttanesca, smellpassar líka með lambakjöti og jafnvel léttri villibráð.

Librandi Ciro Rosso DOC 2014 fær fjórar stjörnur - FRÁBÆR KAUP á þessu verði en flaska af þessu víni kostar einungis kr. 2.295 í vínbúð allra landsmanna.

Vínhúsið Arcanum er staðsett í nálægð við borgina Siena í héraðinu Toskana, nánar tiltekið í suð-austur hluta svæðisins Chianti Classico. Vínhúsið er í eigu Jackson-fjölskyldunnar sem á og rekur vínhús víða um heim, þ.á.m. í Bandaríkjunum, Frakklandi, Chile og Ástralíu. Við stjórnvölinn er víngerðarmaðurinn Pierre Seillan, þekktur fyrir sín störf bæði í Krakklandi og Kaliforníu.

Vínhúsið leggur mikla áherslu á að rækta franskar þrúgur og eru þar fyrirferðarmestar þrúgur á borð við Merlot, Cabernet Sauvignon og Cabernet Franc. Á þessum bæ er áherslan lögð á gæði en ekki magn en vínhúsið framleiðir einungis þrjú vín og endurspeglar hvert þeirra ákveðin karakterseinkenni víngerðarinnar í Arcanum.
 
Á áttunda áratug síðustu aldar hófst „Super-Tuscan“byltingin þegar vínbændur í Toskana hófu að setja á markað afburðarvín sem uppfylltu ekki skilyrðin til að teljast DOC/G-vín en mörg þeirra öðluðust aftur á móti viðurkenningu víða um heim. Þessi vín falla undir flokkurinn IGT (Indicazione Geografica Tipica) leggur mesta áherslu á uppruna vínanna en síður hvaða þrúgur eru notaðar við víngerðina framleiðsluaðferðir vínanna eða stíl þeirra.
 
Vínið sem hér um ræðir, Il Fauno di Arcanum IGT 2012, fellur í þennan flokk en það er framleitt úr þrúgunum Merlot (48%), Cabernet Franc (27%), Cabernet Sauvignon (22%) og Petit Verdot (3%). Vínið er fyrst látið þroskast í 12 mánuði í frönskum eikartunnum og síðan látið þroskast áfram á flöskum í töluverðan tíma áður en það er sett á markað.
 
Þetta rúbínrauða vín tekur á móti manni með angan af kirsuberjum og krydduðum tónum. Mikil fylling, fersk sýra, silkimjúk tannín og virkilega ferskt og flott eftirbragð sem lifir lengi. Dásamlegt vín í fullkomnu jafnvægi sem kemur manni sífellt á óvart. Mjög gott akkúrat núna en gæti jafnvel batnað enn frekar á næstu árum.
 
Þetta er stórgott matarvín sem hentar virkilega vel með rauðu kjöti, bæði lambakjöti og nautakjöti, dásamlegt jólavín sem hentar fullkomlega með villibráðinni, hvort sem við erum að tala um rjúpu eða hreindýr.
 
Il Fauno di Arcanum IGT 2012 fær fjorar og hálfa stjörnu – Frábær kaup á þessu verði. Drífið ykkur út í næstu verslun og tryggið ykkur flösku af þessu úrvals rauðvíni á frábæru verði.
 
Í HNOTSKURN: Frábært matarvín í góðu jafnvægi, mikil fylling og eftirbragði sek lifir lengi.

Í héraðinu Friuli – Venezia Giulia, rétt við landamærin við Slóveníu og Austurríki, er að finna vínhúsið Venica & Venica sem er nú ögn þekktara fyrir sín dásamlegu hvítvín en framleiðir einnig virkilega flott rauðvín úr frönsku þrúgunum Merlot og Cabernet Franc.

Venica Collio Merlot 2013 er framleitt að öllu leyti úr frönsku þrúgunni Merlot sem barst til héraðsins Friuli-Venizia Giulia árið 1869 og varð fljótt útbreidd um allt héraðið. Allar aðstæðurnar í Friuli-Venezia Giulia ásamt ákjósanlegu hitastigi henta þessari frönsku þrúgu virkilega vel. Vínið er látið þroskast á slóvenskum eikartunnum í 12 mánuði áður en það er tappað á flöskur og sett á markað.

Þetta rauðfjólubláa vín tekur á móti manni með angan af dökkum berjum og  miklum ávexti, t.d. spila plómur, kirsuber og brómber stór hlutverk. Hér er um að ræða virkilega mjúkt og ávaxtaríkt vín með góðri sýru og miðlungstannínum. Flott matarvín.

Venica Collio Merlot 2013 fær fjórar stjörnur – GÓÐ KAUP á þessu verði, kr. 2.895.

Þetta flotta matarvín smellpassar með rauðu kjöti, jafnvel villibráð og mörgum klassískum og bragðmiklum pastaréttum á borð við Penne all‘Amatriciana.

Vínið sem hér um ræðir, Santa Cristina IGT, kom fyrst á markað árið 1946. Í upphafi var þetta vín skilgreint sem Chianti Classico en frá árinu 1987 var það fyrst skilgreint sem Vino da Tavola en síðan sem IGT en sá flokkur kom til sögunnar árið 1992 í þeim tilgangi að auka frelsi í ítalskri víngerð. Flokkurinn IGT (Indicazione Geografica Tipica) leggur mesta áherslu á uppruna vínanna en síður hvaða þrúgur eru notaðar við víngerðina framleiðsluaðferðir vínanna eða stíl þeirra.

Santa Cristina Toscana IGT 2014 er framleitt mestmegnis úr þrúgunni Sangiovese en að auki er að finna í litlu magni þrúgurnar Cabernet Sauvignon, Syrah og Merlot. Vínið er látið þroskast til helminga á stáltönkum annars vegar og hins vegar eikartunnum þar sem það fær að þroskast í 6 mánuði.

Veðurfarslega séð í Toskana var árið 2014 mjög óvenjulegt, jafnvel svo sérstakt að elstu muna ekki eftir öðru eins. Veturinn var óvenjulega hlýr og vætusamur, enda um að ræða hlýjasta vetur á þessum slóðum síðan 1834. Þegar leið fram á vorið breyttust hlutirnir lítið, hitastigið hækkaði hægt og rólega en vætan hélt áfram. Svo kom sumarið með hita undir meðallagi með þó nokkurri vætu og töluverðum raka. En til allrar hamingju kom bjartur og sólríkur september eins og himnasending og bjargaði víða uppskerutímabilinu.

Þetta rúbínrauða vín tekur á móti manni með miklum angan af dökkum berjum, t.d. sólberjum og kirsuberjum, að auki örlar á eik, jörð og jafnvel lyngi. Í munni er vínið ávaxtaríkt, t.d. er þar að finna kirsuber, hindber og sólber. Hér er um að ræða vín í góðu jafnvægi með mjúkum tannínum, flottri sýru, góðri fyllingu og þó nokkru eftirbragði.

Santa Cristina IGT 2014 fær þrjár og hálfa stjörnu - MJÖG GÓÐ KAUP á þessu verði, kr. 1.999.

Þetta er virkilega flott matarvín sem passar vel með bragðmiklum ítölskum pastaréttum t.d. réttum á borð við Spaghetti all'amatriciana, Spaghetti alla puttanesca og gæti líka smellpassað með Kjúklingi veiðimannsins.

Það hefur verið stunduð vínrækt í Púglía í fjögur þúsund ár, lengur en í flestum öðrum héruðum Ítalíu. Í Púglía er framleitt meira magn af víni en í nokkru öðru héraði landsins. Á undanförnum árum hefur vínræktin í Púglía tekið stakkaskiptum og framfarirnar verið miklar, þökk sé nýrri tækni og nýjum viðhorfum í vínræktinni.

Vínið sem hér um ræðir, Il Nostro Rosso Puglia IGT 2015, kemur einmitt frá héraðinu Púglía og er framleitt úr tveimur af helstu þrúgum þess, Negro Amaro og Primitivo, ásamt pínulitlu magni af þrúgunni Malvasia Nera. En þess má geta að þetta vín er einvörðungu framleitt úr lífrænt ræktuðum þrúgum. Vínið er að hluta til látið þroskast í eikartunnum í sex mánuði áður en því er tappað á flöskur og sett á markað.

Þetta rúbínrauða vín tekur á móti manni með angan af rauðum ávexti, kirsuber ríkjandi. Þetta er ávaxtaríkt vín, mjúk tannín og ágætis sýra. Hér er um að ræða létt, mjúkt og þægilegt vín sem hentar vel með ýmsum ítölskum pastaréttum, t.d. Spaghettí með hráskinku, tómötum og chilli.

Il Nostro Rosso Puglia IGT 2015 fær þrjár stjörnur – ÁGÆTIS KAUP á þessu verði, kr. 1.999.

Í hjarta svæðisins Chianti Classico í héraðinu Toskana, nánar tiltekið mitt á milli borganna Flórens og Siena, er að finna vínhúsið Isole e Olena, eitt allra besta og athyglisverðasta vínhús þessa dásamlega héraðs. Vínhúsið varð til í þeirri mynd sem það er í dag þegar De Marchi fjölskyldan keypti tvo vínhús, annars vegar Isole og hins vegar Olena, á sjötta áratug síðustu aldar og sameinaði þau undir nafninu Isole e Olena. En saga þessara tveggja vínhús í sitthvoru lagi nær aftur um hundruði ára. Í dag er vínhúsið rekið af Paolo De Marchi og hans fjölskyldu. Paolo De Marchi hefur að mörgu leyti haldið fast í sérkenni svæðisins með því að leggja mikla alúð í ræktun staðbundnu þrúgunnar Sangiovese en leitar á sama tíma stöðugt leiða til að bæta sín stórkostlegu vín.

Veðurfarslega séð var árið 2013 nokkuð venjulegt ár í Toskana. Vorið var svalt og þó nokkuð blautt. Sumarið hófst með áframhaldandi bleytu, þ.e. allur maí var nokkuð blautur og langt fram eftir júnímánuði. En síðan kom loksins sumarið og júlí, ágúst og september voru einstaklega hlýir og sólríkir mánuðir sem gjörsamlega björguðu uppskerutímabilinu og gera vín frá þessu uppskeruári einstaklega áhugaverð.
 
Isole e Olena Chianti Classico 2013 er framleitt úr þrúgunum Sangiovese 80%, Canaiolo 15% og Syrah 5%. Þetta vín er fyrst látið þroskast á tiltölulega litlum eikartunnum í 12 mánuði og síðan er það látið þroskast áfram í 3-4 mánuði á flöskum áður en það er sett á markað.
 
Þetta kirsuberjarauða vín tekur á móti manni með angan af dökkum ávexti, kirsuber. Rauður ávöxtur í munni, pínulítið kryddað, vottur af steinefnum og þónokkur eik. Mikil og fersk sýra, mjúk tannín. Virkilega flott matarvín. Góður karakter í flottu jafnvægi, flauelsmjúkt með meðallöngu eftirbragði. Þetta er vín sem gerir góðan mat betri og vínið sjálft verður líka betra með góðum mat.
 
Isole e Olena chianti Classico 2013 fær fjórar stjörnur, jafnvel fjórar og hálfa – ágætis kaup á þessu verði, kr. 3.590.
 
Hér erum við tala um virkilega flott matarvín sem smellpassar með rauðu kjöti, t.d. lamba- og nautakjöti, ásamt léttari villibráð. Prófið þetta vín endilega með Nautasteik alla Pizzaiola en það er pörun sem steinliggur. Umhellið þessu víni með góðum fyrirvara, leyfið því að opna sig.

Vínhúsið Cecchi er eitt af þessum gamalgrónu í Toscana, stofnað árið 1893 af Luigi Cecchi og fljótlega fór sonur hans, Cesare Cecchi, að starfa við hlið föður síns. Orðspor vínhússins fór ekki á flug á alþjóðavisu fyrr en undir stjórn annars Luigi Cecchi, barnabarns stofnandans sjálfs. Í dag er fjórða kynslóðin við stjórnartaumana í vínhúsinu Cecchi en það eru bræðurnir Andrea og Cesare Cecchi. Vínhús Cecchi-fjölskyldunnar hefur ávallt lagt mikla áherslu á að framleiða klassísk og vönduð vín sem fullkomlega eru trú uppruna sínum.

Vínhúsið Cecchi er eitt af þessum gamalgrónu í Toscana, stofnað árið 1893 af Luigi Cecchi og fljótlega fór sonur hans, Cesare Cecchi, að starfa við hlið föður síns. Orðspor vínhússins fór ekki á flug á alþjóðavisu fyrr en undir stjórn annars Luigi Cecchi, barnabarns stofnandans sjálfs. Í dag er fjórða kynslóðin við stjórnartaumana í vínhúsinu Cecchi en það eru bræðurnir Andrea og Cesare Cecchi. Vínhús Cecchi-fjölskyldunnar hefur ávallt lagt mikla áherslu á að framleiða klassísk og vönduð vín sem fullkomlega eru trú uppruna sínum.

Cecchi Chianti Natio Organic DOCG 2015 er virkilega aðlaðandi vín sem framleitt er úr þrúgunum Sangiovese (90%) og Colorino (10%). Þetta vín er framleitt einvörðungu úr lífrænum þrúgum á svæði í Toskana sem kallast Colline del Chianti. Þetta vín er fyrst látið þroskast á stáltönkum í u.þ.b. 6 mánuði og síðan látið þroskast í að minnsta kosti tvo mánuði á flösku áður en það er sett á markað.

Þetta rúbínrauða vín tekur á móti manni með nokkuð áköfum angan af ferskum ávexti, vottur af kryddi. Ávaxtaríkt vín þar sem kirsuber, bláber og plómur spila aðalhlutverkin. Þetta er mjúkt vín í góðu jafnvægi með nokkuð flottan strúktúr.

Cecchi Chianti Natio Organic DOCG 2015 fær þrjár og hálfa stjörnu – MJÖG GÓÐ KAUP á þessu verði en það kostar einungis kr. 2.290 í vínbúð allra landsmanna.

Þetta er virkilega gott matarvín sem passar vel með bragðmiklum ítölskum pastaréttum, t.d. Spaghetti all‘amatriciana eða Spaghetti alla puttanesca, smellpassar líka með réttum á borð við Kjúklingi veiðimannsins og Eggaldin með parmesan.

Nú líður senn að áramótum og ekki seinna vænna en að birgja sig upp af freyðivíni. Það er fátt skemmtilegra en að skála í góðra vina hópi þegar nýtt ár gengur í garð. Frá Ítalíu koma freyðivín á borð við Prosecco frá héruðunum Veneto og Friuli Venezia Giulia, Moscato d‘Asti og Asti Spumante frá Piemonte og ennfremur koma virkilega góð freyðivín héruðunum Trentino og Lombardia.

Frá Veneto koma að auki létt og ávaxtarík freyðivín sem kallast Prosecco, framleitt úr samnefndri þrúgu sem stundum gengur undir nafninu Glera. Þetta geta verið virkilega góð freyðivín á viðráðanlegu verði sem eru tilvalin til að skála í við góð tækifæri. Það er hægt að nálgast þónokkurt úrval af Prosecco-vínum hér á landi, t.d. Allegrini Prosecco Millesimato Dry (kr.1.89) , Lamberti Prosecco (kr. 1.999) , Villa Sandi Il Fresco (kr.1.995) og Valdo Prosecco Treviso Extra Dry (kr.2.590) .

Í nágrenni bæjarins Asti í Piemonte eru framleidd freyðivín úr þrúgunni Moscato. Hér erum við annars vegar að tala um Moscato d’Asti og hins vegar Asti Spumante. Þetta eru sæt og ávaxtarík vín með ferskleikann í fyrirrúmi, oftast drukkin ísköld við hin ýmsu tækifæri þegar á að skála, t.d. þegar fagna skal nýju ári. Hér erum við að tala um vín á borð við Santero Moscato (kr.1.100), Gancia Asti (kr.1.590) og Martini Asti (kr. 1.599) .

Mörg af bestu og dýrustu freyðivínum koma frá héraðinu Lombardia, nánar tiltekið frá svæðinu Franciacorta. En þar eru framleidd DOCG-freyðivín með kampavínsaðferðinni sem af mörgum eru talin bestu freyðivín Ítalíu, gerð úr þrúgunum Chardonnay, Pinot Blanc, Pinot Noir og Pinot Gris. Í vínbúð allra landsmanna er einungis hægt að nálgast eitt vín frá þessu svæði en það heitir Barone Pizzini Animante Franciacorte (kr. 4.680).

Ekki er hægt að fjalla um ítölsk freyðivín án þess að nefna Ferrari frá héraðinu Trentino sem er einn allra virtasti og að margra mati besti framleiðandi freyðivína á Ítalíu. Við erum svo heppin að í vínbúðinni er hægt að nálgast flaggskip þessa fræga vínhúss, Ferrari Maximum Brut (kr.4.350).

Nú er ekkert annað eftir en að gera upp hug sinn, drífa sig út í  næstu vínbúð og birgja sig upp af veigum fyrir komandi áramót.

Nú líður senn að jólum og ekki seinna vænna að birgja sig upp af góðum vínum sem henta jólasteikinni, allt verður að vera fullkomið. Hér fjallar MINITALIA ítarlega um ítölsk vín með hátíðarmatnum, hvort sem við erum að tala um hreindýr, rjúpu, fasana, önd, gæs o.s.frv.

LÉTT VILLIBRÁÐ
Þegar talað er um létta villibráð er t.d. verið að tala um akurhænur, fasana og villiendur. Hér er um að ræða ljóst kjöt með fínlegu villibragði sem kalla á þó nokkuð öflug vín með mikilli mýkt.

Fasani
Það má að mörgu líkja kjötinu af fasana við kjúklingakjöt en það er þó mun bragðmeira og hefur auk þess með þennan eftirsóknarverða villikeim. Hér hentar vel að bera fram Chianti Classico, jafnvel nokkurra ára gamlan sem hefur fengið tækifæri til að þroskast á flösku um töluverðan tíma til að ná þessari mýkt og margslungnu bragðeinkennum, t.d. mælir MINITALIA með Cecchi Chianti Classico (kr.2.495), Brolio Chianti Classico  (kr.3.449) eða Isole e Olena Chianti Classico (kr.3.590) . Hérna koma líka stóru vínin frá Piemonte sterk inn, þ.e. Barolo og Barbaresco. MINITALIA mælir t.d. með Fratelli Alessandria Barolo (kr.5.199) og Prunotto Barbaresco (kr.4.698).

Akurhæna
Það er bæði hægt að bera fram rauðvín sem og hvítvín með akurhænu. Ef velja á rauðvín þá mælir MINITALIA með léttu og ávaxtaríku Chianti sem þó hefur fengið að þroskast á flöskunni í einhvern tíma, t.d. Leonardo Chianti (kr. 1.999) eða Cecchi Chianti Classico (kr.2.495). Oft er skemmtilegt að bera fram hvítvín með akurhænu sem hefur fengið að þroskast í nokkurn tíma á eikartunnum, t.d. smellpassar vínið Bramito del Cervo Chardonnay (kr. 2.799) með akurhænu. Það er framleitt að öllu leyti úr þrúgunni Chardonnay og hefur fengið að þroskast að hluta á frönskum eikartunnum.

Önd
Hérna erum  við að tala um magurt, dökkt og bragðmikið kjöt sem kalla á kröftugri og bragðmeiri vín heldur en fasani og akurhæna. Með villiönd smellpassar að bera fram bæði Ripasso eða jafnvel Amarone frá svæðinu Valpolicella í héraðinu Veneto. Það hafa akkúrat þann kraft til að takast á við kjöt villiandarinnar. MINITALIA mælir með Sartori Valpolicella Ripasso (kr.2.398) , Tenuta Sant‘Antonio Monti Garbi Ripasso (kr.2.999) eða Tommassi Ripasso (kr.3.199) .

Gæs
Þrátt fyrir að gæsin sé ekki eins bragðmikil og rjúpan þá kallar hún engu að síður á kröftug og bragðmikil rauðvín, t.d. Amarone della Valpolicella, Brunello di Montalcino eða Chianti Classico. MINITALIA mælir með t.d. Tommasi Amarone della Valpolicella Classico (kr.5.499) , Banfi Brunello di Montalcino (kr.5.499) og Fonterutoli Chianti Classico (kr.3.295) .

ALVÖRU VILLIBRÁÐ
Með bragðmikilli villibráð á borð við hreindýr og rjúpu dugar ekkert nema öflug og bragðmikil vín. Þar koma einungis stóru ítölsku vínin til greina, t.d. Brunello di Montalcino, Amarone della Valpolicella, Chianti Classico, Barolo og Barbaresco.
 
Hreindýr
Með hreindýri smellpassar að leita til héraðsins Toskana, t.d. flottum Brunello di Montalcino eða öflugum Chianti Classico sem hefur fengið að þroskast töluvert, bæði á eikartunnum og ekki síst á flösku. MINITALIA mælir með vínum á borð við Fonterutoli Chianti Classico (kr.3.295) , Arnaldo Caprai Collepiano Sagrantino de Montefalco (kr.6.290), Antinori Badia a Passignano Riserva (kr. 5.599) eða jafnvel Il Poggione Brunello di Montalcino (kr.7.390) .
 
Rjúpa
Rjúpan er líklega bragðmesta villibráðin með sitt dökka en þó fínlega kjöt sem einkennist af miklu villi- og lyngbragði. Hérna er virkilega gott að leita á nýjan leik til héraðsins Toskana og næla sér í kraftmikinn Chianti Classico, Brunello di Montalcino eða jafnvel eitt af hinum víðfrægu SuperTuscan vínum. Hérna mælir MINITALIA enn á ný með hinu vandaða en á sama tíma hagstæða Fonterutoli Chianti Classico (kr. 3.295) eða Marchese Antinori Chianti Classico Riserva (kr. 4.299) en fyrir lengra komna þá væri svo sannarlega þess virði að prófa t.d.  eða Il Poggione Brunello di Montalcino (kr.7.390) , Castello Fonterutoli (kr. 7.860) eða Isole e Olena Cepparello (kr. 6.943) .

ANNAR JÓLAMATUR
Ekki má gleyma að minnast á allt hitt sem er í boði um hátíðarnar en hér fyrir neðan verður minnst sérstaklega á vín sem smellpassa með kalkúninum, hamborgarahryggnum, nautasteikinni og lambahryggnum.

Kalkúnn
Með kalkún er hægt að bera fram bæði rautt og hvítt. Ef rautt verður fyrir valinu má mæla með Ripasso, t.d. Sartori Valpolicella Ripasso (kr.2.398) , Tenuta Sant‘Antonio Monti Garbi Ripasso (kr.2.999) eða Tommasi Ripasso (kr.3.199) . Chianti vínin eru líka virkilega góð matarvínið sem passa vel með Kalkún eins og svo mörgu öðru, t.d. Brolio Chianti Classico (kr. 3.449) eða Isole e Olena Chianti Classico (kr.3.590). Ef aftur á móti hvítt verður fyrir valinu þá mælir MINITALIA með víninu Bramito del Cervo Chardonnay (kr. 2.799) sem framleitt er úr þrúgunni Chardonnay og fengið hefur að þroskast að hluta á frönskum eikartunnum.

Hamborgarahryggur
Það er alls ekki auðvelt að para saman vín við hamborgarahrygginn sem er svo vinsæll á borðum landsmanna. Hérna er best að velja létt og ávaxtarík rauðvín frá Valpolicella, t.d. Sartori Valpolicella Ripasso (kr.2.398) eða Tommasi Ripasso (kr. 3.199) .

Nautasteik
Léttsteikt nautasteik ræður vel við nokkuð kröftug rauðvín sem eru með tannín yfir meðallagi, t.d. Chianti Classico, Brunello di Montalcino eða Rosso di Montalcino sem oft er kallaður litli bróðir Brunello. MINITALIA mælir t.d. með Banfi Rosso di Montalcino (kr.2.998) , Fonterutoli Chianti Classico (kr. 3.295) eða Castellani Brunello di Montalcino Brunaio (kr.4.990) .

Lambahryggur
Lambahryggurinn er virkilega vínvænt kjöt þar sem fitan spilar lykilhlutverk. Lambahryggurinn kallar á bragmikil rauðvín, t.d. Chianti Classico, Brunello di Montalcino eða jafnvel Barbaresco. MINITALIA mælir með Fonterutoli Chianti Classico (kr. 3.295), Prunotto Barbaresco (kr. 4.698) og Banfi Brunello di Montalcino (kr.5.499).