Tenuta Sant‘Antonio Monti Garbi Ripasso 2011 - fjögurra stjörnu matarvín

Á bak við vínhúsið Tenuta Sant‘Antonio standa fjórir bræður sem bera eftirnafnið Castagnedi, þeir Armando, Massimo, Paolo og Tiziano. Vínhúsið er staðsett á svæði sem kallast Valpolicella í nágrenni við borgina Verona. Þaðan koma fræg vín á borð við Valpolicella, Bardolino og Soave.

Hér er um að ræða vín sem heitir Monti Garbi Ripasso 2011 og flokkast sem Valpolicella Classico Superiore og ennfremur sem Ripasso. Skilyrðið fyrir því að geta kallað vínin Superiore er að þau hafi þroskast á eikartunnum í að minnsta kosti 12 mánuði. Valpolicella Ripasso er venjulegt Valpolicella sem blandað er berjahrati frá framleiðslu Amarone della Valpolicella, nokkurs konar litli bróðir Amarone della Valpolicella.

iTenuta Sant‘Antonio Monti Garbi Ripasso 2011 er framleitt að 70% hluta úr þrugunni Corvina, 20% úr þrúgunni Rondinella og 10% úr þrúgunum Croatina og Oseleta. Vínið er fyrst látið þroskast í 15-16 mánuði áður en það er tappað á flöskur og sett á markað.

Þetta rúbínrauða vín mætir manni með flóknum angan af kirsuberjum, kryddi, eik og píputóbaki. Mikið bragð sem einkennist af dökkum ávexti, miðlungs tannínum, ferskri sýru og örlítið krydduðu eftirbragði. Mikil fylling og nokkuð góðri lengd.

Tenuta Sant‘Antonio Monti Garbi Ripasso 2011 fær fjórar stjörnur – GÓÐ KAUP á þessu verði, kr. 2.999.

Hér er um að ræða virkilega gott matarvín sem fer vel með svepparisotto, bragðmiklum pastaréttum, t.d. Bolognese, og grilluðu kjöti, t.d. kjúkling og lambi.