1. Ciro Librandi 2013 kr. 2.150
Þetta flotta hvítvín kemur frá héraðinu Calabria sem staðsett er syðst á Ítalíu og er framleitt að öllu leyti úr þrúgunni Greco sem mikið er ræktuð í Campagnia en þar gengur hún undir nafninu Greco di Tufo. Stórgott vín á flottu verði.

2. Banfi Principessa Gavia 2013 kr. 2.269
Vínhúsið Castello Banfi sem upphaflega er frá Montalcino í Toskana hefur verið áberandi hér á landi síðustu misserin. Castello Banfi keypti árið 1970 vínhúsið Bruzzone í Piemonte og þaðan kemur m.a. vínið Banfi Principessa  Gavia. Þetta ferska og skemmtilega vín er að öllu leyti framleitt úr staðbundnu þrúgunni Cortese. Það eru góð kaup í þessu víni.

3. Donna Fugata Anthilia 2013 kr. 2.370
Hvítvínið Donnafugata Anthilia 2012 er framleitt úr sikileysku þrúgunum Ansonica og Cataratto, sem eru uppistöðuþrúgurnar í þessu víni, ásamt smá magni af frönsku þrúgunum Chardonnay og Viognier. Frábært vín sem einstaklega auðvelt er að mæla með á þessu verði.

4. Santa Tresa Fiano 2013 kr. 2.495
Nýlega kom á markað lífræna vín frá vínhúsinu Santa Tresa á Sikiley. Þetta er flott vín sem framleitt er 100% úr þrúgunni Fiano. Ekki skemmir fyrir að það er lífrænt alla leið. Góð kaup á þessu verði.

5. Tommasi Pinot Grigio Le Rosse 2013 kr. 2.499
Hér erum við með virkilega flott hvítvín sem er 100% framleitt úr þrúgunni Pinot Grigio. Þetta vín kemur frá ítalska héraðinu Veneto, nánar tiltekið frá svæði sem kallast Valpolicella Classico. Glæsilegt vín með tilliti til verðs og gæða.