Þetta vín frá Tenute Piccini er framleitt úr fjórum mismunandi þrúgum frá fjórum mismunandi héruðum, þ.e. þrúgunum Primitivo frá Puglia (40%), Montepulciano frá Abruzzo (30%), Nero d‘Avola frá Sikiley (20%) og Merlot frá Veneto (10%). Ennfremur er hérna ekki um árgangsvín að ræða heldur er hinum ýmsum árgöngum blandað saman með góðum árangri.

Lýsing: Dökkrúbínrautt. Meðalfylling, hálfþurrt, mild sýra, mild tannín. Rauð ber, kirsuber,
vanilla.

Piccini Memoro fæst í Vínbúðinni og kostar einungis kr. 1.999.

Hér um hörkuvín að ræða sem endurspeglar fjögur mismunandi héruð Ítalíu. Nýtur sín vel með rauðu kjöti eða villibráð.

Piemonte er eitt virtasta vínræktarhérað Ítalíu og þaðan koma mörg stórkostleg vín. Innan héraðsins Piemonte, nánar tiltekið í hlíðunum umhverfis borgina Asti, má finna svæði sem kallast Langhe en þar má finna mörg af bestu vínum héraðsins, t.d. Barolo og Barbaresco. Vínræktin á þessu svæði einkennist af mörgum smáum fjölskyldureknum vínframleiðendum sem leggja ofuráherslu á gæði framleiðslunnar. Vínhúsið G.D. Vajra er þar engin undantekning og framleiðir framúrskarandi vín á borð við Barolo, Barbera d‘Alba, Dolcetto d‘Alba og Langhe Nebbiolo.

Rauðvínið G.D Vajra Barbera‘Alba er framleitt 100% úr þrúgunni Barbera sem ásamt Nebbiolo og Dolcetto eru þrjár meginrauðvínsþrúgur Piemonte. Þrúgurnar í þetta vín koma af sex mismunandi vínræktarsvæðum innan svæðisins Langhe, þ.e. Fossati, San Pietro, Passau, Fontani, Piedicucche og Bricco Bertone. Þrúgurnar eru handtýndar um miðjan september, gerjun vínsins stendur yfir í 15-20 daga en að því loknu er vínið látið þroskast í 12 mánuði, bæði í eikartunnum og stáltönkum, áður það er sett á flöskur og sett á markað.

Lýsing:
Rúbínrautt. Létt meðalfylling, þurrt, sýruríkt, mild tannín. Hindber, súr kirsuber,lauftónar.

Einkunnir ýmissa fagaðila:
Vinous Antonio Galloni: 89/100 – CellarTracker: 89/100 – Jancis Robinson: 16/20.

G.D. Vajra Barbera d'Alba DOC 2010 fæst í Vínbúðinni og kostar kr. 3.795.

Il Poggione er eitt af helstu og virtustu víngerðarhúsum Toscana en það er staðsett nánar tiltekið í bænum Sant‘Angelo in Colle í Montalcino. Il Poggione hefur yfir að ráða 600 hekturum af landi; á 125 hekturum er ræktaður vínviður, á 70 hekturum ólífutré og restin að miklu leyti skóglendi. Il Poggione leggur gríðarlega áherslu á ræktun vínviðarins og telur það vera lykilinn að árangri í þeirri viðleitni að framleiða stórkostleg vín. Allar þrúgur eru handtýndar eftir hefðbundnum aðferðum.

Il Poggione Brunello di Montalcino er framleitt eingöngu úr þrúgunni Sangiovese sem eru handtýndar af vínvið sem er yfir 20 ára gamall. Vínið er fyrst látið þroskast á frönskum eikartunnum í 36 mánuði áður en það er sett á flöskur og geymt í nokkurn tíma áður en það er sett á markað.

Lýsing: Múrsteinsrautt. Meðalfylling, ósætt, fersk sýra, þurrkandi tannín. Kirsuber, laufkrydd, skógarber, skógarbotn.

Einkunnir ýmissa fagaðila:
Stephen Tanzer: 95/100 – Vinous Antonio Galloni: 95/100 – James Suckling: 94/100 – Wine Enthusiast: 91/100 – Wine Spectator: 92/100 – CellarTracker: 90/100 – Decanter: 16.8/20 – Falstaff Magazine: 91/100 – Jancis Robinson: 17/20

Il Poggione Brunello di Montalcino 2007 fæst í Vínbúðinni og kostar litlar 6.680 krónur.

Gott er að umhella þessu víni með góðum fyrirvara til að gefa víninu tækifæri til að opna sig. Njótið vel með rauðu kjöti, villibráð eða þroskuðum ostum.

Þetta afbragðsgóða vín er framleitt af víngerðarsamlaginu Mezzacorona í héraðinu Trentino á Norður-Ítalíu. En það eiga hvorki fleiri né færri en 1.500 vínbændur aðild að þessu hátæknivædda vínsamlagi. Mezzacorona Lagrein 2010 er eins og nafnið gefur til kynna framleitt 100% úr staðbundnu þrúgunni Lagrein. Það er fyrst látið þroskast í eikartunnum í 6-8 mánuði áður en því er tappað á flöskur og sett á markað.

Lýsing: Rúbínrautt. Létt meðalfylling, þurrt, fersk sýra, mild tannín. Léttur rauður ávöxtur, rauð ber, krydd.

Gott matarvín með skemmtilegan karakter. Nýtur sín vel með grilluðu kjöti og jafnvel léttri villibráð.

Það eru virkilega góð kaup í þessu velheppnaða víni en flaskan kostar einungis 1.799 krónur í vínbúð allra landsmanna.

Grappa er framleitt  úr hratinu sem kallast á ítölsku „vinaccia“ en það inniheldur bæði hýði, stilka og steina. Í upphafi var farið að eima hratið í þeirri viðleitni að nýta allt sem til fellur við víngerðina og með því koma í veg fyrir sóun. Bragðið á Grappa veltur á tegund og gæði þrúganna sem notaðar eru við framleiðsluna og eins hefur gæði eimingarferlisins mikil áhrif á útkomuna. Meðal þekktustu framleiðanda grappa á Ítalíu eru Nonino, Bocchino, Berta, Jacopo Poli og Nardini.

Grappa er flokkað eftir aldri þess og þeirri þrúgu eða þrúgum sem hratið er unnið úr. Helstu flokkar Grappa eru eftirfarandi:

Giovane
Þetta er ungt vín sem geymt er í stáltönkum þar til það er sett á flöskur.

Aromatica
Þetta er vín sem framleitt er úr arómatískum þrúgum, t.d. þrúgunum Muscat, Gewürztraminer eða Malvasia.

Affinata
Þetta vín er sett á flöskur eftir að hafa verið látið þroskast á viðartunnum í allt að 12 mánuðum.

Invecchiata eða vecchia
Þetta er vín sem sett er á flöskur eftir að hafa verið látið þroskast í 12-18 mánuði á viðartunnum.

Stravecchia eða riserva
Þetta er vín er sett á flöskur eftir að hafa verið látið þroskast í meira en 18 mánuði á viðartunnum.

Monovitigno
Þetta vín er framleitt einungis úr hrati einnar tegundar þrúgu sem oftast er getið um á flöskumiðanum.

Aromatizzata
Í þessum flokki er grappa þar sem bætt hefur verið náttúrulegum hráefnum úr jurtaríkinu við framleiðsluna
snemma í eimingarferlinu, t.d. bláberjum, lakkrís o.s.frv.

Í dag er grappa lögverndað vöruheiti af Evrópusambandinu, skv. reglugerð Evrópusambandsins nr. 110/2008. Framleiðendur þurfa þar af leiðandi að uppfylla ströng skilyrði til þess að kalla framleiðslu sína Grappa en þess má geta að í dag eru u.þ.b. 130 framleiðendur af grappa.

Á Ítalíu er grappa aðallega neytt eftir mat til þess að aðstoða við meltingu á þungum mat, á ítölsku digestivo. Að auki er vinsælt að bæta örlítilli slettu af grappa út í espresso og er sá drykkur kallaður Caffe corretto sem þýðir á
íslensku „leiðrétt kaffi“. Annað afbrigði sem kallast Ammazzacaffe ( á íslensku„kaffi morðingi) er þegar maður skellir í sig einum espresso og fylgir honum eftir með litlu staupi af grappa. Þriðja útgáfan er þegar maður hefur nær klárað espresso þá setur maður nokkra dropa af grappa í bollann, hrærir og klárar svo í einum rykk.

Allar nánari upplýsingar um grappa er að finna á heimasíðu safnsins Poli Grappa Museum sem staðsett er í bænum í Bassano del Grappa.