Í héraðinu Piemonte árið 1860 hóf Gaspare Campari kynna Campari fyrir samlöndum sínum. Enn er notast við hina upprunalegu uppskrift og inniheldur hún hvorki meira né minna en 68 náttúruleg hráefni, þ.á.m. krydd, jurtir og ávexti. Einungis tveir aðilar í heiminum kunna uppskriftina frá upphafi til enda og ferðast þessir tveir aðilar skiljanlega ekki saman í flugvél. Árið 1904 opnaði fyrirtækið sína fyrstu verksmiðju í Sesto San Giovanni sem er í nágrenni við Mílanó. Drykkurinn varð fljótt þekktur innan Ítalíu en það var undir stjórn sonar Gaspare, Davide Campari, sem fyrirtækið hóf útflutning á drykknum, fyrst til Nice í Frakklandi en er í dag seldur í yfir 190 löndum um allan heim.

Campari og sódavatn er mjög vinsæll drykkur, svo vinsæll að hægt er að kaupa Campari Soda  í litlum en heimsfrægum flöskum, hönnuðum af Fortunato Depero árið 1932. Þessar flöskur nýtti hönnuðurinn Raffaele Celentano sér árið 2002 við hönnun á ljósinu Campari Light fyrir hollenska framleiðandann Ingo Maurer. Auki er Campari Soda er Campari mikilvægur hluti af mörgum kokkteilum, t.d. Negroni, Garibaldi og Americano.

Bresaola er upprunalega frá svæðinu Valtellina í héraðinu Lombardia. Þetta er loftþurrkaður, saltaður nautavöðvi sem hefur fengið að þroskast í 2-3 mánuði þar til hann er orðinn harður viðkomu og dökkrauður að lit, næstum fjólublár. Fyrst er skorin burt öll fita af vöðvanum, því næst er nuddaður með grófu sjávarsalti kryddjurtum á borð við kanil, negul, blóðbergi, pipar, rósmarín og múskat ásamt einiberjum. Síðan er vöðvinn látinn þroskast í tvo til þrjá mánuði, fer allt eftir þyngd vöðvans, áður en hann er tilbúinn til neyslu.

Þrátt fyrir að það sé oftast nautavöðvi sem notaður er við framleiðsluna þá er líka hefð fyrir því að nota hrossakjöt. Hér á landi er einn aðili, ítalinn Roberto Tariello, sem framleiðir Bresaola úr hrossakjöt eftir aldagömlum ítölskum aðferðum. Afurðir hans er hægt að nálgast t.d. í Búrinu, Frú Laugu og Ostabúðinni á Skólavörðustíg.

Bresaola er oftast skorin í þunnar sneiðar og venjulega neytt eitt og sér. En einnig má skvetta ólífuolíu yfir herlegheitin, safa úr sítrónu eða balsamic ediki og bera það fram með klettasalati, nýmöluðum pipar og flögum af ferskum Parmigiano Reggiano. Best er að geyma Bresaola þétt vafið í plastfilmu inn í ískáp. Hér á landi má nálgast Bresaola t.d. í Hagkaup og Ostabúðinni á Skólavörðustíg.